मोरङ । मोरङमा सुतिरहेकै अवस्थामा २२ वर्षीय युवक मृत फेला
मोरङको रतुवामाई नगरपालिका–७ मा २२ वर्षीय सुदीप यादव मृत अवस्थामा फेला परेका छन्।
झापाको हल्दिबारी–२ घर भएका यादव रतुवामाई–९ का राम भट्टराईको ट्याक्टरमा काम गर्दै आएका थिए।
बुधबार राति मनोज कर्मकारको घरमा रहेको बाँसको चौतारामा सुतेका यादव बिहानीपख मृत अवस्थामा फेला परेका हुन्। प्रहरीका अनुसार उनको मुखबाट फिँज निस्किएको अवस्थामा शव भेटिएको थियो।
शव परीक्षणका लागि विराटनगरस्थित कोशी अस्पताल ल्याइएपछि डाक्टरले मृतकको खुट्टाको तल सर्पले टोकेको जस्तो दाग देखिएको बताएका छन्। तर यथार्थ कारण भने पोस्टमार्टम रिपोर्टपछि मात्र पुष्टि हुने अस्पतालले जनाएको छ।